Энди эса таълим тили ўзга тилда бўлган синфларда давлат тили – Ўзбек тили ҳам чет тили каби ўргатилади. Милли ўқув дастури асосида ўзга миллат вакиллари учун 2-синф Ўзбек тили дарслиги яратилди. Ушбу дарслик 2021-2022- ўқув йилида амалиётга жорий этилади. 

Ўзбек тилини чет тили сифатида ўқитиш кўзда тутилган янги дарсликлар тил ўргатишнинг халқаро стандартлари асосида яратилмоқда. 

Бунда: 

I. Нутқий  компетенсиялар: 

1) актив – гапириш, ёзиш;

2) пассив – ўқиб тушуниш, тинглаб тушуниш. 

II. Лексик компетенсиялар: 

1) грамматика; 

2) лексика – A1, A2, B1, B2.  

кўринишида синфлар кесимида тақсимланган.

Aйни пайтда яратилган дарсликда ўз даври учун муҳим бўлган яна бир қанча қулайликлар мавжудки, улар ҳам ўқувчида тил ўрганиш кўникмасини фаоллаштиради:

Ўқув дарслиги асосида ўқитувчи китоби ва ўқувчи машқ дафтари жорий этилди; 

Лотин алифбосига асосланган ўзбек алифбоси, ҳафта кунлари, саноқ сонлар илк бора ўзбек тилида MP3 форматда болажонлар тилидан қўшиқ қилиб куйланди ва QR-код орқали китоб саҳифаларидан ўрин олди;

Иккинчи тил китобларидаги луғат-таржималар, одатда, икки тилда ҳавола қилинган бўлса, эндиликда улар кенг аудиторияни ҳисобга олиб қозоқ, қирғиз, қорақалпоқ, туркман, тожик, рус ва инглиз тилларига ҳам таржима қилиниб QR-код тизими орқали жойлаштириляпти;

Замонавий дарсликни яратишда тез айтиш, топишмоқ, ўйлаб топ, илон изи, “ҳа/йўқ”, Т-схема, мантиқан ўйлаб топ, ребус, судоку, мунстерберг, шмутс, расмлар ўрнига сўзларни жойла, комикс каби методлардан фойдаланилди;  

Ўқувчининг психологик, ёш хусусиятлари ҳам ҳисобга олиниб, расмлар 70%,  матнлар 30% ўрин эгаллаган; 

Фанлараро интеграция (STEAM) тўла таъминланган.

Яратилаётган дарслик ўзга миллат вакилларига ўзбек тилини ўргатиш учун асосий мустаҳкам манба бўлиб хизмат қилишига ишонамиз.