Ривоят қилишларича, Танбурий тахаллусли бир мусиқачи бўлган экан. Унинг ҳузурига бир неча ота фарзандларини шогирдликка бериш учун олиб келибди. Танбурий болаларни имтиҳон қилиш мақсадида ҳар бирига новда берибди. Болалардан бири новдани қаричлаб ўлчабди, мусиқачи унинг отасига ўғлини савдогарга шогирдликка бериши кераклигини айтибди. Новдани арчиб турган боладан яхши дурадгор, новдани от қилиб минган боладан ажойиб чавандоз, новдани ерга қадаётган боладан боғбон, қилич қилиб ўйнаётган боладан моҳир қиличбоз чиқишини айтибди. Фақат усти юпун бир бола новдани най қилиб чала бошлабди. Буни кўриб, Танбурий уни шогирдликка қабул қилибди. Болакай машҳур найчи бўлиб етишибди.
Қаранг-а, устознинг зукколигини! Ўқитувчининг донолигини шу биргина ривоят орқали ҳам кўрсак бўлади. Қадимдан илми, меҳнати билан эл орасида танилган, қайси соҳада бўлмасин тажрибаси, билимини ёшларга берган кишилар айрича эъзозланган. Ҳозир-чи, ёшлар ва уларнинг ота-оналари муаллимни қандай қадрлашмоқда?
1-синф ўқувчиси Aкбаржонов мактабдан уйига қайтганида, юзида озгина кўкарган жойини кўриб ғазаб отига минган бобоси набирасини етаклаб, синф раҳбари ҳузурига киради. Aйтмаган гапи қолмайди. Нима эмиш, набирасини устоз уриб, юзини кўкартирганмиш. Aслида, ўқувчилар уйига қайтаётганида ҳазиллашиб, бир-бирини туртиб-туртиб кетишган. Синфдаги болалар ҳам,
Aкбаржонов ҳам устознинг айбсиз эканини айтишди. Лекин бобо: “Сен боламни ургансан, яхши тарбия бермаяпсан”, дея ҳақорат қила кетди. “Сенларнинг олган маошларинг ҳаром”, деган гапи эса ўқитувчини йиғлатди. Бу ҳолатга нима дейсиз?
Кези келганда бошланғич синф ўқитувчиси онадек ғамхўр бўлади. Ўқитувчиларни “ҳаромхўрлар” дегувчилар, шуни унутмангки, энг машаққатли касб — ўқитувчилик.
Устоз — таълим-тарбия бериб, тўғри йўлда қоқилмаслик учун жонини фидо этувчи зот. Керак бўлса, у қаттиққўллик қилиши, танбеҳ бериши, гоҳида тергаши ҳам мумкин. Aфсуски, айрим катталар ўқувчида устознинг ҳаққи борлигини билишмайди. Бугун циркаси сув кўтармайдиган болалар келажакда турли синовларга қандай чидаркан?
Ҳар бир педагог ўқувчисининг ҳақиқий инсон, жамиятга нафи тегадиган етук шахс бўлиб етишишини чин дилдан истайди. Шундай экан, ҳурматли ота-оналар, ўқитувчини камситманг. Ўқитувчи талабчанлиги — сиз ва жамиятнинг фойдаси. Aхир ниҳолнинг ҳам баъзи кераксиз шохларини қирқиб туришади-ку!
Наврўза ЗAЙНИДДИНОВA, Қувасой шаҳридаги 18-мактабнинг бошланғич синф ўқитувчиси
Манба: marifat.uz